凍肉好介紹 - 海港

買左靚靚既Le Creuset煎pan，緊係想煎下靚靚牛扒啦。聽講荃灣有間正野，比citysuper / taste平好多既凍肉舖，咁一定要睇睇囉。

<<海港凍肉>>
荃灣德士古道62-70號寶業工業大廈23號地下 (熊貓酒店後面，近球場條橫街)
逢星期三休息

海港主要做批發，不過佢有兩個凍櫃放左少量現貨，同大大張價目俾你參考。佢地d伙計好鬼好人，見我地盲摸摸咁所以出手介紹。我一早諗好要整羊架同牛扒，哥哥仔就解釋唔同國家有咩分別。

主角1 - 美國安格思肉眼扒。有3/4吋厚 (我覺得唔止)，解凍後同citysuper賣既無咩分別! 好香肉味，只係用牛油煎下就食得，唔駛加任何調味!!

主角2 - 紐西蘭羊仔架。有厚厚脂肪，勁羊羶。

4塊牛扒 + 一件羊架 + 藍青口 + 一包法蘭克福腸都只係$600

價錢100分，服務100分(佢地重送個白酒煮青口既食譜俾我添)。我下次要買鵝肝試下先~~~

Wii Fit後遺症

呢兩個星期烏雲蓋頂，做咩都無心機。終於... 買左Wii Fit Plus，希望做下運動會好d。

Wii Fit Plus較以前多左唔同既遊戲，但係我唔明繁體中文版點解會用普通話發聲  試玩左大部分遊戲，武術同數字波波最好玩，而且消耗唔少體力! 玩左一個鐘就已經好辛苦，流左勁多汗。

今日起身先知大鑊，d手手腳腳痛死! 我條腰而家緊哂，真係有排攪...

我的第一個Le Creuset

如果有睇過飲食男女就應該認識Le Creuset既煲--來自法國，純手工鑄鐵製造，色彩亮麗。雖然幾鐘意，不過三千幾蚊買個煲? 都幾肉痛。

公司附近開倉，今次竟然有Le Creuset賣  

話明係開倉，好多靚既顏色同款式都欠款，好彩有經典既煲款同煎鍋，而且尺寸齊備，正!! 我既目標係一個中煲(可以炆野同煮煲仔飯)同一個煮牛排既煎鍋，點知攞上手先發覺好~~重~~呀，如果買上面可以加冰o個種就更加重死人，唯有放棄啦。

最後買左個煎鍋，橙色好鬼靚  呢個煎鍋係好處係均勻受熱，可保存肉汁，老細你有口福啦!

同事們都買左幾個，但... 佢地都好少煮飯喎。成千蚊(無錯，折左都要成千幾蚊)買嚟整沙律? 哈哈，其實都係想滿足下大家既虛榮心啫。

... 我最近發覺自己買煲多過買袋... 大鑊! 我重未想做師奶住!!!

我的第一個Le Creuset

唔知大家有無聽過Le Creuset既

去水腫 = 薏米 + 赤小豆?

啤梨身形既我長期處於水腫狀態 (係我個中醫師話架)，雖然一直有調理，但係要我戒清可樂、生冷野、甜食... 真係難左少少喎。

係報紙睇左一個食療，話薏米對去水腫好有功效，又平而且無需特別處理，幾好。少少薏米加赤小豆煲水飲，連飲28日見效。

筆者話成個人輕左，唔知我d水腫有無5磅呢? 28日後再檢討...

儲印花...

話說買左間屋仔後，我既師奶指數直線上升!

呢排好鬼鍾意儲印花，哈哈，又可以換多個煲煮大茶飯囉。

p.s. 多謝莊媽無限量供應惠康印花