裝修 - 第二週

嘻嘻，點解咁快就有新進展? 其實我地間屋已經裝修好啦

第二個星期整好左好多項目: 新造電制位ok、窗台爆雲石位補好、牆既翻新油漆 / 新地腳線 / 翻新天花線全都造好。

對於窗台漏水真係有排講。師傅建議我地先同管理處反映，如果係外牆滲水的話就歸物業管理喎。搵左管理處試水(即係向外牆不停射水，之後再檢查滲漏情況)，點知佢地話係窗台玻璃膠蝕左，呢d虛耗物唔會包。咁只好叫師傅幫我補啦，唔搭棚。師傅詳細睇過，佢估計係大裝(即承建商既本身裝修)時d窗邊無鋪足夠灰，而家就幫我鋪厚少少，外面窗台同洞洞就補番d防水膠上去。 又唔見多個袋...

裝飾門框換左淺啡色。原來門框都有兩種，一種係圖案木板(較平，不過只可以砌正方門)，另一種係厚身木條(較貴，但可以訂造拱形或其他)。我當然係用平野啦，都有好多款選擇架，大家可以去太子麥當當後面既舖頭望下。

我學會了
- 木造天花線可以選擇翻新，效果同新無咩分別，慳錢又環保。
- 如果唔需要新加插蘇位，可以選擇翻新地腳線，唔駛換過又平d。
- 記得要諗清楚電話線/lan線位置，開定多幾個位。