買袋新地方 - Reebonz

不得了，不得了!!

人妻又搵到一個買手袋的好地方 - Reebonz

這個新加坡的網購公司，專門售賣各名牌的減價 / 過季貨品。差不多每天都有新貨品推出(可惜每款只有1~2個，要快手!!)，價錢比市面平更不時有額外折扣，加上免運費(他們是走Fedex的...)，安坐家中已經可以買得心頭好，爽。

人妻看中Balenciaga一款小手包(clutch)，10月份錯過了，幸好趕及買到這聖誕禮物

上

www.reebonz.com登記成為會員，再到面書like就可享有5-10%額外折扣。現在用citibank信用卡還多5%折扣，好抵!!


另一讚賞時送貨速度! 雖然訂單指3-14個工作天，但人妻第二天就已經收到，而且包括十分精美
黑色禮物盒 + 金色絲帶，同事們見到嘩嘩聲


拆禮物...


漂亮!


還附上聖誕卡...

又用新眼霜 (Bioxil)

之前買的Clinelle眼霜覺得唔錯，油脂粒粒明顯減少，不過熊貓眼仍然存在。

今次試用 - Bioxil

店員介紹這個來自瑞士的護膚品牌比Clinelle的成份更好。買了一支Protective eye cream，專為了解決黑眼圈的問題 (店員小姐話人妻眼皮油脂不太多，而且無咩眼紋，yeah!!)

Bioxil Protect Eye Cream

加強排水，減少發炎，淡化黑眼圈及眼袋，增加皮膚彈性和緊緻，提升膚質密度，撫平眼紋，滋潤和保護眼部脆弱肌膚，提供持久保濕，使膚質透亮及潤澤，保護皮膚免受壓力和由光線引起老化之傷害。

是因店員太好口，人妻忍不住多買一支Protective moisturizing cream。

Bioxil的眼霜質地較厚，搽了兩星期油脂粒粒無多到，黑眼圈還是差不多...

要繼續試下，報告完畢!!!

 

睫毛班 (update)

Yeah!! 終於都成功黐到假眼睫毛啦... 原來劃咗眼線先黐真係容易好多，15分鐘完成...

好低B，俾大家睇下港女自拍

嚟個近鏡...

導師話相比搽眼睫膏，黐假眼睫毛對眼睛嘅傷害較少! 我要再努力，目標5分鐘...

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

是咁的... 人妻自己試過同youtube自學黐假眼睫毛都失敗，見有團購就立即訂咗個初級班，希望學到嘢啦。

星期六終於肯去ENID美睫工作坊上堂，d同學仔年紀有大有細，都幾得意。一小時包導師講解同實習，聽落好似好容易。

送一支膠水、donut睫毛盒、一對假眼睫毛

當然，實際係好鬼難。人妻攪咗半個鐘，最後要導師"幫忙"下先成功離開教室(因為已經超哂時，所以無影到相)。

睇嚟要再下一排苦工先得啦...

檸檬水美白

今次試飲檸檬水美白，聽講宋慧喬都係用同一種方法。其實好鬼簡單，每日半粒檸檬加1000cc水飲用就可以有抗氧化效果喎。

頭一個星期飲覺得好辛苦，喉嚨唔多舒服而且日日要搾檸檬都幾麻煩(檸檬汁放耐咗會無效) 。後來我決定將檸檬汁製成冰粒，真係方便好多。

人妻已經飲咗一個月，每早一杯加一粒檸檬冰，有無白到就未知，不過排毒又幾有效喎(後來先知可以排毒)。

P.S. 人妻平日只用SPF15嘅BB Cream，下次見到面麻煩睇下我有無白到呀!

 

神奇卸妝水

自從決定好好解決黑頭問題之後，發現皮膚清潔原來好重要 (對唔住，我真係而家先發覺...)。一直以來人妻都只做三個步驟：用洗面奶洗面、敷鮮奶，之後搽晚霜。無錯，係連爽膚水都唔會用架。

諗諗下好似要做多少少，所以買咗呢支Bioderma 深層卸妝潔膚水(Sensibio H2O)

由法國生產，全世界每分鐘賣出8支! 聽講唔需要用其他卸妝用品，就可以澈底清潔皮膚!!

清爽．溫和．水潤　潔淨首選
星級推介的BIODERMA Sensibio H2O深層卸妝潔膚水，罕有地在潔淨度與溫和度之間取得平衡，兼容兩大優點；獨有Micelle配方，同時含有水溶、油溶份子及脂肪酸脂微胞，三重潔淨份子有效踢走雜質及致敏源等。

Sensibio H2O將繁複的護理程序大大簡化，令卸妝、潔膚、爽膚一Take過。100% 不含香料、色素、酒精、刺激成份及鹼性成份等，性質温和不澀眼晴，適用於脆弱的眼周與嘴唇。

Sensibio H2O的高效而温和配方，不但得到皮膚醫生的認同，更深受一眾城中藝人、名摸、星級化妝師及美容編輯愛戴，瞬即成為貼身恩物，卸妝潔膚水推出至今已售出超過100萬支，而且更於近年勇奪多個世界各地獎項，已被視為專業化妝師的Best Partner。

人妻平日只會搽BB Cream，用完洗面奶再試用卸妝水，果然仲有少少污穢喎，不過唔知係咪心理作用呢? 如果只係用卸妝水就要兩片化妝綿先得，所以都係用洗面奶 + 卸妝水好d。呢支卸妝水性質好溫和，抹完塊面唔會太乾，唔錯。

見萬寧做推廣，折咗$128。點知早幾日發現卓悅只係$80... 頂! 好彩行貨有得攞試用裝... 下次真係要去卓悅格下價先!

曼谷慢慢遊 - 探險篇

搵哂資料問哂人，諗住去水上市場見識下。點知...

老友JoJo提醒我要早d出發，遲咗無咩嘢睇。倆口子已經8點幾起身，唔知點解都攪到11點先坐車... 好囉，一上車好心嘅泰國姐姐問我哋想去邊，一話Amphawa佢就係咁擰頭。大穫!! 原本Amphawa水上市場已經收咗檔 (有興趣嘅朋友最好10點前到達呀)...

泰國姐姐同我講咗一輪 (我當時都唔知佢講咩架)，之後又同司機嘰嘰喳喳講咗一陣。到咗Amphawa真係鬼影都無隻喎，不過我見到個牌都想落車，泰國姐姐係咁話唔好，吓... 想載我哋去邊架 ??

原本佢叫司機載我哋去另一個水上市場 ~ Damnoen Saduak 

講真呢個水上市場就商業化好多，不過坐咗咁耐車有得行下已經好好!

Damnoen水上市場出面有間7-eleven，可以幫你call車返去曼谷。不過我哋決定繼續行程，去美功鐵路市場 (Mae Klong)，車程大約20分鐘。

人妻覺得呢個地方似街市多d，好有蔡生逛菜欄嘅感覺。等呀等，就係為咗睇火車開出時阿姐骨牌式收檔嘅震撼場面。

如果坐車去Amphawa / Mae Klong，大家可以參考
http://hk.myblog.yahoo.com/jw!Qe734H2AExyJ8har42bS/article?mid=263

曼谷慢慢遊 - 喪買篇

其實只係大人喪買

大人之戰利品: Levis牛仔褲(好抵呀，折咗三百幾)、Gap、泰國仔T-Shirt、真皮公事包(JJ Market自家設計，一千蚊都唔駛。大人上次幫襯過勁讚，今次再嚟進貢...)

人妻之戰利品: BraBra (正常價，見幾靚咪買)、真皮手袋(最愛嘅粉紅色，要500大元架!!)

(送俾)朋友之戰利品: BB泰國衫、泰國仔T-Shirt、木手槍

另加半喼林真香同大量冬陰公杯麵，Boots手霜，幫朋友仔買嘅milk bag...

最大收穫係Maybelline睫毛膏，香港減價都要$79，泰國只係$45 。下次一定要入多幾支!

P.S. 話說人妻買滿2000銖可以退稅，都有155銖架。點知去到機場先知要扣手續費 ~ 100銖!!! 減埋連一杯咖啡都買唔到呀，如果大家趕飛機就唔攪好過!

曼谷慢慢遊 - 喪食篇

5日4夜，所謂喪食只係倆口子眼闊肚窄嘅想像

Central World 午餐，一點都唔似泰國餐廳。

人妻難得食fish & chips，好香口。大人有最愛嘅牛扒，薄薄地有炭燒味。

Chong Nonsi站出面間Lek Seafood (2號同4號出口中間)，價錢實惠，燒大頭蝦係食過咁多間最好嘅 。

唐人街最多人幫襯嘅T&K (綠色制服)同R&L(紅色制服)，個人認為R&L好食好多! 我哋忍唔住Encore咗兩晚，推介生蝦、燒東風螺同蠔餅

豪咗一餐，去Aubergine食法國菜。
Address: 71/1 Saladaeng Road Soi 1/1, Silom, Bangrak, Bangkok

餐廳環境一流，歐洲式小屋坐得好舒服。當晚唔太多人，我哋好似包場咁...

Set menu有990銖或1990銖，我哋揀咗後者。食物好滿意，人妻最欣賞香煎鴨胸同檸檬雪芭 (不過唔係幾好意思影太多相 )

曼谷慢慢遊 - 預備篇

等到頸都長，大人終於考完試可以散下心。話明散心就揀個唔需要行程，但又唔能夠太悶 (即係得陽光與海灘)嘅地方啦... 咁曼谷最好，拜拜神食到暈。

鑑於之前不快經歷，人妻盡量唔會揀d艇仔 -- 即係細嘅旅行公司訂機票。多得Facebook，係Thailandfans個專頁見到好多人用嘅新哥 (Sun travel)，佢哋不時都會有減價酒店，一個電話已經做哂所有訂票工作，之後入數確認就可以，對懶人我非常方便。

機票: 泰國東方航空 (我都唔知點解會訂... 咁早出發嘅機票)

去程好彩地安排咗我哋坐上層，咁大個女都係第一次。回程又好好彩被安排坐前排 (原為商務位)，而且估唔到有Oishi飛機餐!! 不過好睇唔好食...

酒店: Furama Silom Hotel

酒店位置唔錯，不論去Central World或唐人街都只需15分鐘車程，步行到附近Chong Nonsi BTS站都只係10分鐘。房間好大，張床可以金絲雀咁轉幾個圈。不過唔係好多的士司機識，我哋之後同司機講Sofitel就容易好多(Furama對面)。

大人唯一係投訴無免費wifi，佢之後仲好認真寫咗係意見書

資料搜集: 仲哥2011-12旅遊書 + blogger們貢獻

行程: 無

時間問題無特別諗過行程，5日4夜必去JJ Market同水上市場。其餘就係食，食，食!!!

曼谷慢慢遊，出發~~~

第一淘

唔係第一次淘寶購物，不過次次都係搵朋友幫手付款。人妻覺得要開個支付寶戶口，又要另外增值實在麻煩。

大鄉里而家先發現 -- 淘寶可以用信用咭付款 (不過要俾1%手續費)!! 而且DBS card有優惠，買滿$100可免$30運費添...

我嘅第一淘，小紅帽貓iphone4套

P.S. DBS優惠去到6月30日，$30運費會以回贈方式扣除

第一次返鄉下...

成日話自己係香港人，因為從未返過鄕下。活咗咁xx年，我對鄉下嘅唯一印象係農田+農田，同廁所會係魚塘旁邊方便餵魚... (呢d都係媽咪話我知架)

話說大人係好傳統嘅福建人，又話說鄉間大部份親友都未見過我... 所以今個清明節，我以莊氐人妻第一次回鄉去也!!

心諗: 上大陸要轉車再轉車，起碼10個鐘。
實情係: 坐過境巴士，再由深圳直飛泉州(我第一次坐內陸機呀)。3個小時旅程好快過。

心諗: 住係親友家，一定係十分簡陋無馬桶。
實情係: 親友家就好似大嶼山渡假屋，而且重好~~大添。

心諗: 實要一早起身爬幾個山頭，帶哂乳豬切雞去拜山。
實情係: 唔駛行，坐車都只係半個鐘。原來而家拜山興帶小食水果囉。

三日兩夜，都係吵吵鬧鬧閒話家常。雖然大部分時間都係聽我聽唔明嘅外星話，不過開始覺得自己係莊氐一份子囉 希望下次我會記得哂小朋友嘅名啦...

最愛的晚裝

一直保持神秘... 因為係媽咪結婚時著過嘅裙!!

整理成長片段時同媽咪戲言，搵到條裙一定著! 估唔到搬家數次都重係到、估唔到阿女咁Fit、估唔到我咁有吉士著上身

簡單得來又閃閃，真係靚到無朋友，一定唔會撞款。最緊要係背後嘅意義，你睇我o地笑得幾一致??!!

我自己好鍾意，相信媽咪都幾開心同感動。 

婚後媽咪先講佢有好多晚失眠，原來係掛住我呀。攪到我都眼濕濕添... 媽咪kiss kiss kiss U

P.S. 我條頸鏈係DIY架! 媽咪同我睇左好多條都唔合心水，點知俾我睇中個同心鎖(呢...公主嫁到o個個呀)。 其實鋪頭係俾小朋友，我o地就自己加條鏈囉。我諗我都係創先河

 

婚禮後記 - 我的小小DIY

其實我同好多準新娘一樣，好想DIY少部份項目。諗過自己整手花襟花，又或者小手袋俾姊妹，可惜為人懶惰最終都無實行。

幸好有個小小小任務可以俾我過下手癮...

公司有幾位老外要請，人數唔多所以無謂另外印一批英文請帖啦。好多朋友都會用牛油紙印一張活頁，不過我就選擇咗再懶d嘅方法。

印個內容落白紙，再表上咭紙。當然咭紙要加少少花邊啦!!

中式請帖 + 西式邀請咭，(我自己覺得)都幾唔錯呀

婚禮後記 - 過大禮

以為一早開始籌備會好輕鬆，點知都係攪到一頭煙。唯有用倒序法啦...

過大禮係結婚一個月前進行，我o地幫襯咗<<結婚易>>過大禮套裝，$800幾合理。其實價錢同金都差唔多，見佢o地幾好人又有o野送喎(上頭套裝 / 送貨)，所以好快就訂咗。

應母親大人要求，一切依(佢所知嘅)傳統習慣。所以女家準備咗...

女家回禮、茶禮、三色餅(唐餅、西餅、潮州餅)

男家送嚟...

過大禮套裝、海味、生果籃

另外有我嘅嫁妝...

子孫三寶(面盆、痰罐、水桶)、行李箱、龍鳳被

吉時到，莊生舅父舅母就送哂禮物上嚟。一輪打衝鋒，媽咪派完回禮利就禮成啦，只係用咗半個鐘。依習俗男家要搵一個女性長輩負責送禮(所以搵咗莊生舅母)，而準新人係要迴避架!!