Wall sticker

實在太開心啦~~

去呢到搵搵:
- 淘寶
- 賣Home

傢俬篇

見新屋正正方方，諗住買現成傢俬就得。我地行左九龍同新界唔少地方，以下有少少心得:
灣仔、銅鑼灣 - 睇都唔敢睇，貴到飛天
宜家、沙田個傢俬廣場、九展 - 貴貴地，不過款式唔錯
DSC、實惠 - 幾平，d款都唔錯
上海街舊傢俬舖 -  平，但係d款好老土

睇左九展比較有設計既舖頭，計計下原來同訂造差不多，再加上老細要一個專門既display櫃，咁不如全部造好過。有幾間我地曾經考慮:
新世紀廣場六樓 - 我地睇中左一間有套餐(約xx呎收xx錢)又唔太貴既。點知網上好多人話佢係黑店
上海街設計學校附近 - 呢間既設計好新，可惜價錢貴。
九展五樓 - 最角位有間細細既舖頭，都係有套餐。我幾鍾意個玫瑰花衣櫃，可以諗諗。
牛頭角一排傢俬店 - 大部份都好似上海街咁，其中一間有玻璃門就係啦。

 我地最後搵左牛頭角o個間。雖然係網上搵唔到有關既意見，但見佢地老老實實，我又睇中左佢個大衣櫃喎，加上佢自動波俾折扣我地，好! 就搵你啦!!

睇過其實blog友既經歷，我最擔心就係佢地"講就天下無敵"。得我一個女仔等佢地裝櫃，真係唔想有咩出事要同d師傅嘈。咁老細話個老闆同佢一樣係外星人，一定會落力d喎~~~

師傅上左新屋度尺後，出左兩次圖我地先收貨。唉... 佢既設計真係好"傳統"，竟然畫左我阿媽張床既圖嚟(床頭櫃有兩口燈o個種)，咁我地又要花時間搵過d參考設計俾師傅。

呢間公司都算有擔待，決定圖後2~3星期交貨(我地中間有追過兩次)。佢地搵左兩個師傅嚟裝，電視櫃、display櫃、油壓床，只係用左兩個鐘多少少，重冇要求過飲野同小費添。

衣櫃: 橫樑位度得幾準，唔駛臨時改。

老細個display櫃: 又係好準，同裝飾門框平排。

我覺得實物同圖有100%準，最緊要係無爛無花，無手尾跟就最開心!!

美味滷溏心蛋 (簡單版)

而家整滷水食物真係簡單左好多，坊間有不少調好既醬汁，瑞士汁、滷味汁、可樂汁、甜豉油... 加水煮再放入喜歡既食物就ok，慳左唔少時間。

溏心蛋
- 凍水落雞蛋，水要蓋過所有蛋。水滾後煮多1~2分鐘，熄火焗5分鐘
- 用凍水過冷河，去蛋殼
- 將雞蛋放入剛剛熄火既滷水中，再焗多10-15分鐘

哈哈，真係太簡單啦

裝修 - 第四周

進入最後階段:
- 地板翻新
好好，新既一樣(不過太令啦)。聽講而家可以整磨沙地板，大家不妨問下師傅

- 裝燈，上電制位
d燈真係靚到爆  但係電制就中左招。因為無留意報價，原本師傅係用舊式既clipsal制，唔係我地想要既新款大大粒制(E8 / E3000)，不過唔想再攪所以收貨。

- 裝窗簾架
呢個真係有排講呀，係網上有好多介紹，不過好壞參半。睇過幾個地方，其實間間既款式/布料都差唔多，價錢方面有以下結論:

以package計以花園街最平，平過旺角樓上舖同大陸。Package指一般屋苑設計，你只要話佢知有幾多個窗同尺寸就可以報到價，包師傅上門度尺同安裝。

如果好似我地間屋d窗咁大，舖頭就唔會做package，即係要貴好多。為o左慳錢我地決定自己度尺買。窗簾路軌可以係五金舖搵到，約$10一呎，如果有曲尺窗可以叫舖頭代屈。度窗框後記得加多2-3吋水位，另外要睇下有無假天花影響計算。

至於窗簾布我搵左花園街一間排檔造，佢地既布料大約$28-48一碼(包勾仔)，重有特價$18款式添。間檔仔係花園街近太子一段，一星期內交貨。呢到都有窗簾路軌賣，不過就要$12一呎。

- 換大門門鎖
應管理公司建議唔攪大門，只係換鎖。原本師傅話換鎖頭就得(只係幾百蚊)，點知上手業主換鎖時已經整壞左個芯(滑哂錏)。好彩最後換左個門芯就得，如果成個鎖換哂要成三千幾呀...

嘻嘻 收左楸大鎖匙，呢個星期可以話完工囉。傢俬後話。

香草烤羊架

有左個大大焗爐，真係唔整下野都對唔住自己啦。簡單少少試個烤羊架先...

材料  
羊架
黑胡椒 (要胡椒粒，唔可以用胡椒粉)
香草 (我今次用左迷迭香Rosemary)
檻欖油

我訂左急凍既羊架，原條連脂肪。兩條都只係$2xx，有興趣可以係"明邦"訂。

1. 羊架解凍後用黑胡椒(落多少少野味d)、迷迭香、檻欖油同鹽醃1小時。想入味d可以將羊架放入雪櫃。
2. 用錫紙蓋面，放入預熱左既焗爐焗20分鐘 (約180度火)
3. 反轉羊架，用200度多焗20分鐘
4. 移開錫紙焗2-5分鐘，令表面較香口

非常簡單又成功既菜式，個個都話好嫩好juicy!! 下次我要試下牛牛/烤雞先!

注意:
- 我保留左羊脂肪，咁食落會羶d
- 唔加豉油醃羊架，會比較原汁原味 (怕羶者小心!)
- 最好先焗後切件，可以保留肉汁

 

裝修 - 第三週 + 深圳買燈記

呢個星期既主要項目:
- 全屋上油漆
- 廚房sink盤 + 工作台面

- 翻新浴缸
開始我地想換過個浴缸，但師傅發現好有問題... 原來承建商係整好個浴缸，先封廁所塊牆，如果要整就變成大工程啦! 好彩師傅勁睇得出，如果唔係就大鑊 。最後搵左翻新公司攪，重可以換顏色。

師傅提我地下一個星期就要裝燈，咁我地星期六就"那那聲"上左大陸搵。

係旺角睇過唔少燈飾舖，不過價錢都幾貴。朋友個個都話大陸又平又靚，無理由唔信啦... 買大陸燈有兩個方法:
1. 上淘寶訂，比較平不過無保障
2. 上深圳自己搵

係好多blog都有介紹深圳買裝修物資，我懶，所以諗住買燈同門柄就算。最集中最齊全有兩個，田貝四路同寶安北路。

我地去既係比較新潮既田貝四路，黃崗坐的士約15分鐘(RMB$3X)。有少少似上海街燈飾舖，街既兩邊都有店，另外有幾間大既裝修用品商場。我地行左一邊街，就決定係同一間舖到買哂所以燈囉。有幾快手? 兩點幾出發，六點幾就走得  幾鬼有效率。5口燈加哂都唔駛2千，好抵呀~~

以下係少少建議:
- 先上淘寶搵定d心水款式同價錢，因為睇睇下會眼花撩亂。(我地做哂功課先咁有效率架)
- 盡情殺價。大部份舖頭都會開半價，我好開心覺得平咁多既時候，見到另一班香港朋友開價3折... 好後悔無再講價。
- 記得要求加水線。要預留時間，佢地加水線同試燈要成幾個鐘架。
- 最好即買即攞走，平左運費之餘又肯定d燈無問題。送貨要加幾百蚊又驚有事要換，咪攪。我地兩個人加一架手拉車就攞到。
- 買完野係深圳灣(即落馬洲)過關，人少d而且通常有位坐。不過坐的士就貴少少(約RMB$5x)。

p.s. 如果大家諗住上大陸買電制就要小心，我聽到燈飾舖個女仔教個裝修師傅用假野呀。佢地將d既clipsal制(我估係假既)換個新盒賣呀，重話無人會發覺添，真係驚...