婚紗禮服 - 店舖篇

講到婚禮禮服好多朋友仔都會非常煩惱，唔知點解，我從開始就決定左心目中既婚紗同晚裝 - 就係唔要蛋糕裙!!  因為個子嬌小，我覺得A-line或者貼身既款式會比較好睇 (當然要瘦下身啦)，而且感覺會高d。

咁鍾意蕾絲既我，THE ONE就緊係想要古典婚紗啦，不過價錢太貴，所以會搵仿古款式。相比其他準新娘，我已經篩選左不少既項目囉。

既然唔係千億新抱，咁目標都係中中價既婚紗店。至於喜好係好個人既，大家參考下好啦...

金都 - 我同莊生有行左個圈，無問過價錢。因為網上太多...唔... 所以唔會考慮。

百利 - Couple Beauty (www.facebook.com -> group -> couple beauty)
網上有大量相片參考，可以睇中先約試身，慳番唔少時間。sales幾好人，就算無約都有機會俾你試身。

百利 - Charming Image (www.cimage.com.hk)
剛剛結婚既朋友仔用過，網上都有相片參考。不過成日都好多人，而且我已經有兩對相識既新人訂佢地，都係算囉。

尖沙咀婚紗街 - Princess
有一系列幾高貴，不過價錢就... 莊生好鍾意，我就未有"叮叮"既感覺。佢一定要預約先可以試身。

觀塘 - 藝心
幾年前朋友仔用過，莊生話地點太遠(呢個其實好重要，下面講)，我本身亦無諗過係到租衫。但呢到既媽咪衫征服左我! 可能大家會覺得媽咪衫唔緊要，其實佢地身型先最難就。藝心既媽咪裙有成本相簿，出面通常就只有10款左右，係呢到一定可以滿足媽咪同未來奶奶。 而且價錢實惠，老人家訂多幾件都唔肉痛。

太子 - 感恩無盡 (www.thanksgiving.com.hk)
一開始有好多相放係網上，不過而家已經鏟走哂，經理話俾好多公司抄款喎。呢間婚紗店唔出名，我係婚禮雜誌見佢地d款幾靚同比較特別，雖然店內既款唔太多，但有我想要既A-line款。sales服務好好，我第一次試衫時佢地有俾意見不過無迫我開單，重俾我媽咪試左兩條裙添。

除左Princess，大部份都係$4xxx有1件婚紗 + 2年晚裝 + 1件男禮。呢個價錢當然唔包拖尾/閃閃珠片等附加費。

選擇婚紗店舖小貼士
- 千祈唔好問結左婚朋友邊間好，佢地個個都會話自己用個間。反而睇下blogger既意見比較中肯。
- 我認為先參考5-6間店舖，再從中選1-2間就夠。愈多選擇就愈花多眼亂。不過就算你有預算考慮，都建議睇下d名(婚紗)店。起碼見識過貴價係咪好野，又或者租一套貴幾款平d都唔錯呀。
- 要留意額外加錢項目，有無包飾物、頭紗、披肩等。
- 相信大家都無可能係一間婚紗店搵到所以心儀既衫裙，我覺得2間已經係極限。因為租衫通常為三日兩夜，我個朋友仔分開租~尖沙咀兩間、觀塘一間，加上租掛同姊妹裙，真係辛苦死。