嘻嘻，點解咁快就有新進展? 其實我地間屋已經裝修好啦
第二個星期整好左好多項目: 新造電制位ok、窗台爆雲石位補好、牆既翻新油漆 / 新地腳線 / 翻新天花線全都造好。
對於窗台漏水真係有排講。師傅建議我地先同管理處反映，如果係外牆滲水的話就歸物業管理喎。搵左管理處試水(即係向外牆不停射水，之後再檢查滲漏情況)，點知佢地話係窗台玻璃膠蝕左，呢d虛耗物唔會包。咁只好叫師傅幫我補啦，唔搭棚。師傅詳細睇過，佢估計係大裝(即承建商既本身裝修)時d窗邊無鋪足夠灰，而家就幫我鋪厚少少，外面窗台同洞洞就補番d防水膠上去。
裝飾門框換左淺啡色。原來門框都有兩種，一種係圖案木板(較平，不過只可以砌正方門)，另一種係厚身木條(較貴，但可以訂造拱形或其他)。我當然係用平野啦，都有好多款選擇架，大家可以去太子麥當當後面既舖頭望下。
我學會了
- 木造天花線可以選擇翻新，效果同新無咩分別，慳錢又環保。
- 如果唔需要新加插蘇位，可以選擇翻新地腳線，唔駛換過又平d。
- 記得要諗清楚電話線/lan線位置，開定多幾個位。
收樓時好多野都無留意到，見屋主斯斯文文，估佢住左咁多年都有維修下... 點知... 師傅一拉開d牆紙就發現個窗台漏水呀! 重唔只一個窗，而係同一個方位既窗都有問題，廳既窗台更漏水嚴重到鋼筋發漲迫爆左塊雲石添。
原有牆紙同裝飾門框係十幾年前既款式，都幾老土。
諗住廚房一直有用應該無野，一睇又出事... 個煮食爐有一個頭壞左，sink盤原來爛左兼滴水，攪到下面個廚櫃霉哂。唉~~ 因為咁我地個廚房要買過哂d野同重新造個枱面同部份櫃。(
呢個星期無咩特別，主要拆除舊既裝修。娘爆牆紙無哂，裝飾門框、窗簾拆左。廚房sink盤同工作台面已經唔見左，雪櫃個假櫃拆左，成個廚房大哂。
我學會了~
- 千祈咪夜晚睇樓/收樓，有好多野未必會睇得清楚。
- 收樓時一定一定要檢查所有水喉同電器(如果有包)，真係要開哂d制再等一陣，睇下有無漏水同有無電到。我地當時"係咁似"開下睇睇，原來無用架。
8月份忽然買左樓，由選擇地區、搵地產、睇樓、決定、同業主還價，最後簽約只係用左一星期。咁...就買左我現有最最最貴既玩具啦。其實之前都睇左好多地方，窩山 / 太子道 / 大圍 / 大角咀，點知買左一個諗都無諗過既地點，所以都有少少講緣份。
到左要裝修啦，呢個大project主要係由小妹負責，大鑊~~~
經過左一個月既辛勞，我終於明白到"出外靠朋友"呢個道理，除左要多謝好多朋友仔，重要感激blog既發明 
先睇下我地間屋，600幾呎實用有80%而且冇窗台位，個廳重係正正方方添。
上手業主無大攪過間屋，好既係我地唔駛估佢加減過咩野，唔好就係佢用到d野好鬼殘。有幾殘後話。
搵左3個師傅報價，價錢都差唔多，所以決定一個唔駛我地攪咁多野既師傅。間屋主要係翻新，無太大難度
全屋牆紙轉油漆
翻新/換天花地腳線
翻新/換地板
廚房翻新
廁所翻新
換裝飾門框
加電制位
睇落好簡單，點知... 唉... 大家再繼續睇就知...
P.S. 、多謝JoJo提供咁多有用資料俾我、蕭生介紹左好師傅、Carol經驗分享，特別鳴謝兩家爸媽，佢地將屋企既物資一一交出，又幫我地搬來搬去，真係"世上只有媽媽好..."
<<It's not a love story, it's a story about boy meets girl>>
這是一個有關愛情既故事... 男的認為愛是一生一世，女的不相信天長地久。男女既發展係500日裏穿插，玩味十足。
好耐無睇過愛情小品，唔一定要大團員/喊生喊死都可以做得好好。每人對愛情既觀點都不一樣，要睇清真係要有d智慧先得!!
配樂好聽，我決定要買soundtrack回味下。最無奈係坐隔離o個個話無聊，激死
又嚟家庭聚會(其實係表弟妹間既聯誼活動)，今次試下Haagen Dazs既雪糕自助餐。呢個推廣唔係間間分店有，而且有指定時段，記得要先要訂位。$89加一，可以係一小時再任食約20款既雪糕 + 一款雪糕甜品 + 一杯飲品。
訂左9:30~10:30，嘩...咁多人既，成層2樓坐滿。最後一個時段有個好處，坐耐d都得，我地最後攪到11:30先走
係張好似點心紙畫下畫下，一行6個年青人，粗略估計就消滅左120球雪糕。食食下我地開始分唔到d味道，例如紫色既係summer berries定夏日雜莓呢(實在係中英文既稱呼...)? 個人推介summer berries同lemon sobet，千祈咪試raspberry sobet，勁似細細個飲既藥水!!
Quota用盡，我應該一年內都唔會再食雪糕啦!!
週末去左澳門玩兩日，放低唔少銀兩... 好彩都食番唔少好野 
我地今次住威尼斯人，d房真係幾大，不過服務就麻麻地。
到埗先去大利來豬扒飽，好慘，四點幾已經無哂豬扒飽同牛筋麵 (唔知點解呢日咁多人??)，幸運地重有我最愛既豬扒多士。
去左新濠天地參觀參觀睇下美人魚，又到食飯時間。原來想去既金都自助餐滿哂，最後去左<<台山水佬榮>>食火鍋，係澳門朋友介紹既。只要坐車去關閘再行5分鐘左右就到，不過記得要訂位。
我地叫左最出名既花甲蟹煲(懶人走蟹)、手打墨魚丸 (勁彈牙!!)、肥牛、枝竹、本地生菜同生麵，再加啤酒同鮮庶汁，重有香港先生陪食都只係$4xx!! 個花甲煲十分足料，有成40-60粒蜆蜆，而且有大量菇類同西芹做配菜，兩個人一定食唔哂。
星期日既午餐諗住幫襯滔滔介紹既魚翅麵 (其實朋友話試過就唔會想食下次)，點知大排長龍。咦?? 原來官也街開左間禮記喎，不過都係好多人，老闆娘同我地講有10張枱等緊... 咁唯有去對面買下手信先啦。註定有運行，一買完手信就有枱，好野有翅食 
兩窩花膠海參魚翅 (足料，d湯鮮甜同好膠!) + 蟹盒 (香口好味) + 蜜汁豬頸肉 (普普通通) + 禮記炒飯 + 菜心，承惠$3xx。多謝Cindy媽請客
朋友先行告退，我同男友繼續去MGM參觀，話哂華仔係到拍過戲喎。玩到8點幾先走，yeah!!
小妹用左BB cream都有... 4至5年囉，用過既牌子都有好幾種... 哈哈，都算半個專家既。以下純粹係我個人意見，大家可以參考參考。
BB cream既由來:
B.B.是Blemish Balm的縮寫，之前係於在醫學美容上的，俾d皮膚有傷痕既病人使用，有皮膚再生同保養既功效。後來韓國人加以改良就成為具備了打底、保養同防曬於一身既BB cream啦。
Missha
我用左兩年，質地唔錯容易推開，而且控油能力極強! 搽上面唔會有粘住粘住既感覺，可惜不含防曬。
UGB
好多人都讚佢好用，不過我就覺得白左d唔夠自然。容易推開，好潤，但控油就麻麻，如果好似我咁多面油 (要用兩張面油紙!!) 就唔建議UGB啦。我用左之後出豆豆...
PALGANTONG
我既旅行出trip最愛! 佢係唯一有推出旅行裝既。水份極高而且容易推開，顏色都幾自然。最緊要係防曬能力高，SPF有25度，加上細緻碎粉SPF30真係無得頂。控油都可以，去到夜晚都唔覺好多面油。
Hanskin
新試，用左一個星期效果唔錯。未見有豆豆出現，面油控制都可以，另外遮瑕都好好。我應該會繼續用，不過香港未有門市麻煩d。
搽BB cream既小貼士:
先用保濕 --> 擠出一粒紅豆份量既BB cream係手背 (係紅豆呀! 好多人就係搽得太多變左油光面 / 蠟像面) --> 推開少少再直接搽上面
如果有用開蜜粉既話加少少，咁就keep得好d
我用左綠豆粉好耐啦，一個月敷一次面，有排毒去斑斑既作用。
佢又平 ($10一大包) 效果又好，只係時間就要花多少少囉。綠豆粉既用法同面膜粉一樣，只要將d粉加水攪成糊狀，再敷上面 / 身體等佢乾就可以。敷既時間會覺得涼涼地，敷完後皮膚會立即滑左!
係人都知綠豆係清熱既食物，所以呢... 綠豆粉就有排熱毒既功效!! (我有問過中醫架，佢地重話我咁醒識得用添) 我已經用左好幾年，大家唔需要擔心有咩副作用。呢排我又開始用番，今次用來敷背脊
綠豆粉係雜貨店同雀仔街都可以買到。
旅程既最後一日，優閒地去山野午餐。
坐半小時車車去到三義，呢到有一個荒廢左既火車站，以前係用嚟運物資，而家就成為左一個旅遊景點 (唔講我都唔知有個咁既地方)。好有趣，感覺似日本既舊火車站... 沿著火車軌行重可以通過一個好似<<千與千尋>>個隧道添!
另外有一條斷橋...
其實嚟呢到既目的係整 -- 擂茶。以前睇蔡生有介紹過，睇嚟幾好玩：
- 先將茶葉磨成粉，加入花生、黑白芝麻磨至出油 (要10 - 15分鐘，好累)
- 加入日本綠茶粉，加暖水及炒米就可以飲啦!
原來而家興擂茶兩食架！我最鍾意佢地將d材料打成綠茶沙冰，yummy~~~
話咁快就5日囉... 又要開始計劃我下個行程先
今次行程之一係陪男友去台中探朋友仔，好多謝朋友仔帶我地去左好多香港人唔會到既好地方!
坐高鐵由左營站到烏日，約一個小時。本人覺得有少少似深圳既和諧號...
下午到埗後立即去左泡溫泉，朋友仔話山區入面有好多有特色既溫泉旅館，可惜唔夠時間。我地坐車去最近既係日光溫泉會館，日式，好鬼新。訂左獨立房，兩個小時約$250，幾合理。
叉完電，去左一間熱爆既日式燒烤餐廳 -- 乾杯。聽講有好多名星幫襯，訂位都要等一個星期 (好彩朋友仔一早安排)。呢到既食物都ok，幾新鮮，但主要都係食氣氛囉... 因為佢地會為一對對既情侶 / 朋友拍kiss kiss寶麗萊，之後你就可以放係店內任何一個地方。如果夠膽既話，ｄ店員重會邀請你係大家面前表演添!!
我都有一張...
另外餐廳有個宣傳，只要係8點一齊乾盡手上既飲品，佢地就會送多杯俾你，乾杯http://www.kanpai.com.tw/
飯後上左一個山頂睇夜景 + 走走夜市就返酒店囉... 因為...本小姐俾一杯cocktail整醉左
去到台灣，咁一定要試多d小食啦；樣樣都只係十幾蚊，唔食多d真係對唔住自己。一隻燒魷魚都只係$10，我食左兩晚。 另有燒花枝丸、蒙古羊肉串、腸仔，飲左好多杯珍珠奶茶同奶綠。唉... 破哂戒。
食左一餐幾好既泰國菜，都算貴貴地: 泰式生蝦 (好食) + 生蠔、炒粿條 (好普通)、春卷 (估唔到咁香口)、炒通菜，兩個飲品... 多謝$500
一定要介紹後壁湖既漁市場，呢到既用餐環境真係麻麻，但係海鮮就 --> 平靚正：刺生 (男友追話好新鮮)、蜆湯 (好清，鮮味)、白灼螺 (都係覺得白酒煮好食d，不過佢地無)、炸花枝丸... 都只係$160!! 推介炸花枝丸，一碟有成15粒，十分彈牙；而且炸得非常香口，我一個人就KO左2/3
有好多網友都話後壁湖既"輝哥"好，不過我覺得間間都係差唔多，唔駛等位。
去墾丁可以坐大巴或者打的，我地訂左民宿既相熟司機。價錢差不多，不過打的就舒適d同快好多，車程大約要2個半小時。
唔記得講，我極力推介既高雄旅館，原因之一係樓下有間Subway!!
一早坐車，去到民宿都已經12點幾。墾丁有少少似南Y島，主要以民宿同小店為主分佈係不同既沙灘附近。而道路有點似布吉，有一條較熱鬧既大街，前後一條路行車。我地住既民宿係船帆石，離大街約10分鐘車程，比較寧靜 (住大街一定吵死)。司機大佬話船帆石同大街可以行到去，咪試呀... 我地行左5分鐘就熱到想死 
我既民宿，最正係個露台，我地兩日都係到睇日落。
兩日係墾丁既行程非常簡單，去唔同既沙灘hea，行下大街買野 / 食野...
大街有好多小遊戲，男友挑戰射籃球。
細細個玩既煙花，好靚... 有人放龍吐珠，超美，同維港煙花有得fight (可惜我影唔到 ^_^)
早機出發到高雄，懶... 所以去到先做落地簽證。記得要換定200元台幣，因為高雄機場個對換店係出面架。
坐捷運大約30分鐘出市區，check in後就出去食野...
原本打算找小店食下地道野，可惜太太太熱啦! 最終決定去<<夢時代>>(係一個大商場)。可愛既粉紅接駁車~
<<夢時代>>係一個新都會 + 葵涌廣場既合體，老實講無咩野買。最驚喜係發現呢到都有得換paddington bear!!
佢既food court就幾多元化，價錢都可以，所以有唔少學生哥嚟幫襯。食完飯行左一陣，就去到我既重頭戲，Hello MiMi摩天輪! 其實本小姐係有少少畏高，唔明點解咁恨坐摩天輪?? 
驚完一輪... 休息陣之後去夜市開餐。
高雄有兩個大夜市，一個係六合另一個係瑞豐，兩個都係捷運站附近。聽講六合有d似香港既廟街，遊客去多，而瑞豐就本地人去多，咁緊係去個本地薑啦 ! 瑞豐夜市唔大，約一小時可以行完。見d人係大排檔食牛排餐同壽司都幾過癮...
早d返酒店，聽日要一早坐車去墾丁 ! (其實之後再食左杯麵先瞓得著，哈哈)
前日影左d相，成個麵包超人咁!! 明明照鏡都無事架，死啦死啦... 立即上網搵左d瘦面方法，打botox最好 (不過唔駛咁誇張呀)，最後決定買呢支cream試試:
