好! 等我繼續先...
花球 - Rhythmewedding Venus
100分。少見既粉紅色花，而家已經去o左台灣囉。
手花 / 襟花 - River何太
100分。效率奇高，要講下特別設計o既主人家襟花，何太同我email來往好多次先決定到架。我有個姊妹都已經/準備搵何太幫手。
化妝 - Charming Image Ellen
100分。Ellen幫我整o既造型真係無得頂，個個都讚靚同特別。話說我有條媽咪結婚著過o既裙，佢竟然可以諗到一個馮程程頭，我十分鍾意!!
攝影 - Desmond
未有相睇，不過當日成team人都非常落力，而且早拍晚播條片... 10萬個讚!
小禮物 - My M&Ms
95分。呢個都算係我o地DIY項目，多謝兄弟由美國帶番嚟。其實無咩大攪作，只係M&M上面有我o地個名同大日子。唔知d賓客有無留意到呢? 我自己就十分歡喜啦
小妹終於都嫁o左人啦，正正式式成為(靚)師奶一名
婚宴 - 翰騰閣 (又一城)
食物 ~ 100分。雖然我無食，但所有朋友 / 親戚 / 同事都話正! 佢o地最欣賞個翅同蒸魚。
服務 ~ 85分。上菜人手都足夠，不過負責影相排櫈個侍應就唔多醒目。上菜上得好快(有少少趕收工咁)，我o地40圍都可以11點散席，到尾尾要我地叫住先慢番d，大家要記住啦。
場地 ~ 90分。包全場有哂所有佈置，基本上都唔駛再加o野 (都無位放)。今年佢地重加多o左好多裝飾，重提供煙霧機添。
音響 ~ 85分。酒樓後半d聱有少少沙，而且外面"鳥籠"位係收唔到o既。
花車 - 銀禧
100分。準時，主花車及28座小巴包裝飾，主花車個花球重好靚添。司機有禮貌，亦無其他網友講咁R利是(當然我o地都有俾)。
婚紗/晚裝 - 感恩無盡
100分。靚，新，乾淨(重可以要求d咩?)。可能我租A-line，所以朋友都讚夠特別
媽咪衫 - 藝心
100分。多款，乾淨。藝心係我o地見過最多媽咪衫o既舖頭，而且佢o地員工好清楚媽咪級o既需要，幫我慳番唔少牙力。
姊妹裙 - Isabella Wedding
100分。服務好，乾淨，價錢平。$200以內就租到，款式又多。不過老闆娘要下年3月先出山，大家要留意留意。(sorry無相睇，姊妹唔出得鏡!)
唔... 重有唔少細節，等我再組織下先分享啦~
終於都完成o左我既大大大project啦!! 有好多多謝未講, 好多o野未同大家分享, 好多物資未處理...
我會快手將後記分享!
各位, 睇住我o地o既靚靚wedding tree先!!!
已經唔記得左係邊搵到概念 -- 結婚樹。
加上大家既祝福 (finger print)，咁我地棵樹就會變得又大又靚。
開始覺得塊面乾乾地，又係時候用我鍾意既sleeping pack啦。
幾年前第一次用Laneige Water Sleeping Pack，真係驚為天人!! 搽左塊面粘粘地，怕第二日會生粒粒既我，點知可以咁水潤喎，駛搽其他cream非常方便。當時重係訂水貨年代，但sleeping pack就成為左我冬天不可缺少之物。
愛上sleeping pack...
Laneige - 粘性高，冬天用比較適合。我會先放雪櫃才用。
H2O - 我覺得質地太水唔夠潤，不過唔同時候都可以用。
彩豐行保加利亞玫瑰 - 只用過試用裝，質地太厚成日好似Gel住塊面。第二朝未吸收哂重有少少粘。
上年媽咪係韓國買左UGB既人參sleeping pack，比Laneige容易吸收，好清爽。有淡淡既人參味，係我既最新寵兒。今次買左皇牌Aqua cream，聽講一搽就吸收哂，好勁~~~
同場買左Innisfree Green Tea Sleeping Pack。之前用過Innisfree既紅酒軟爽水，可以好容易咁去死皮，睇下sleeping pack又好唔好用先。
P.S. UGB同Innisfree係香港都無分店，大家可以係試試係Yahoo拍賣或者信和7樓搵下。
婚紗展我地去左好多次，不過只係幫襯過訂酒席。一直想最後先訂既紅酒同租車... 如無意外今次應該係婚禮前最後一次囉。
我地既目標(1) - 租花車
心目中想租倫敦的士 + 28座小巴(因為莊生知我鍾意英國)，上次婚展已經格哂價，諗住今次坐低俾錢就ok啦。點知個sales見我地打算租倫敦的士，就係咁迫人要部新d又貴d既款式。
之後去左<<銀禧>>問，佢地得番金色倫敦的士有期，表明來意之後個sales介紹我地租另一款車，我唔識個牌子，不過見部車係棗紅色又幾豪華咁，都ok既。莊生問左朋友仔，話呢個牌子車係貴野喎... 佢可以配同色28座小巴唔需要加錢，重送絲花花車佈置添。
計計數，其實係<<銀禧>>租車會貴少少，不過我見有花車佈置送都抵番囉。雖然有d意氣用事，又無查過呢間公司係咪黑店，至少佢地有誠意呀，所以我地決定用佢!!
我地既目標(2) - 訂紅酒
因為我唔識飲酒所以莊生話事。試左兩間(大約8種左右)，主力$80以下既款式。好快我地就決定係新翹行訂囉，個sales招仔好攪笑，係咁話唔駛買咁貴，又不斷俾d酒我地試喎，見佢咁有heart，又有25%回購，OK啦!!
訂左Ch. Laquirou 2007 Cote，因為佢個樽好鬼靚
新翹行www.sunstalent.com.hk
為左滿足媽咪既要求，我不得不努力學習中式禮儀，同搵下邊到買喜慶用品啦 
睇左三十幾篇資料，詳盡到呢... 我覺得網友bubibu最貼心
http://hk.myblog.yahoo.com/jw!rSx7UvyeFQK_0NOwsoA4cE2G/article?mid=6941
我今次反而想講下係香港買喎。因為我地住得遠，兩個人坐車來回就已經百幾蚊，加上買既野唔多，人仔又咁高喎，計下計下發覺係香港買都唔會貴好多既。如果有朋友仔同我一樣又懶又怕麻煩都可以諗下。
美華清貨大特賣:
5呎勁傳統龍鳳被 @ $200
敬茶茶壺套裝 @ $68 (筍崗 ~RMB60)
回禮利是封 @ $5包，有20個 (筍崗 ~RMB2，有12個)
囍字cushion @ $50對連芯 (筍崗 ~RMB30)
當然大家已經買唔到啦 
花園街(近旺角)排檔仔:
大囍字貼紙 @ $10 (筍崗 ~RMB8)
小囍字貼 @ $3 (筍崗 ~RMB2)
紅傘 @ $25 (筍崗 ~RMB15)
佢地檔仔細細但好齊全，連卡通囍字貼同相簿都有。老闆娘好好傾，最後再平左俾我地添。
過大禮已經包上頭套裝同對聯，而上頭睡衣係花園街都有得買，可惜女裝就只有粉紅色。
我地既婚紗相早於一年多前已經影左，莊生話唔要香港喎，所以都係台灣或日本。後來因某人快過我地選左心儀既北海道，最終決定揀台灣。
台灣影婚紗相，我既強項啦! 高雄/台中有好多婚紗公司，不過佢地好少係香港攪展覽，亦唔會有agent。如果大家有興趣就要努力上網啦。
大家可以參考: www.verywed.com / www.wed168.com.tw
莊生唔係好熱衷影婚紗相，我可能之前做part time見得太多，好似d女名星咁講... 都無咩感覺囉! 所以我地覺得靚靚地，唔太誇張就可以。懶惰既我搵左一間係香港有agent既<<京宴>>，見佢地化妝影相都唔錯，有人跟進之餘，重係全包套餐喎。我鐘意佢地唔硬銷又唔駛講數，最唔想見有人黑面啦。
www.goodswedding.com (香港) / www.jing-yann.com.tw (台灣)
影相部分可能係我地無特別要求啦，三日兩夜過程順順利利，三個月內就有哂d製成品。
哈哈!!! 睇落好似好容易? 主要因為我太清楚影相、揀相同攝影公司既古惑野啦。
婚紗攝影選擇小貼士
- 靚唔靚係好主觀既，不過服務態度同作品就好實在。小心參考公司介紹既作品，如果有喜歡記得要問清楚同指定攝影師。
- 多唔代表好。如果你去到展覽訂，sales為求開單一定會話送好多野俾你(佢地咁遠過嚟...)。不過你要諗下自己真正想要咩，謝咭你有無用? 油畫大d你有無地方放? 要記住運費係你俾架，多d重d咪又貴d... 好似我就唔要謝咭同簽名布，換左無鏠相簿。
- 所有優惠要白紙黑字，尤其是送既物品(假眼睫毛、安瓶、花球等等)。
- 預先討論加相價錢。呢個係最失預算既項目，通常係開單時會有較多議價空間。總之加得愈多就愈平，另外要問清楚包唔包soft copy。
雖然好似斤斤計較，但各位之後就可以放鬆心情影相! 影完相開心完先講數黑面就無謂囉。
唔... 俾張相大家睇下...
一直以為媽咪好潮，諗住過大禮既儀式簡簡單單就可以。唉... 點知佢地話要跟足喎... 真係好鬼頭痕(其實媽咪之前已經要求過莊生上門提親啦，咁認真
呢個就係我問左N咁多位老人家得出既結果:
男家要送兩籃過女家，女家回返一籃
椰子一對
檳榔一對
龍鳳燭一對
男女家對聯
茶葉兩罐
禮金
八京果，青縷，紅頭繩，扁柏
另外要加三牲(好彩呢樣媽咪話唔駛)，洋酒兩枝，海味四種x2，生果四種x2。生果唔可以用李(離)同橙(慘)。
女家回以下吉祥物品
蓮耦、石榴、發財芋頭、添丁薑、扁柏、柚葉、芙蓉 -- 全部都要x2，而且愈新鮮愈好
女家重要回茶禮
大發一底，煎堆、紅包、糕點 x 8
金都同百利都有得賣，百利有間重可以散買添。我重問過錦發同美華，不過美華4月已經光榮結業啦，老闆只做批發喎，哈哈，我重執左d平貨添。
最攪鬼係佐敦街市蓮姐，張紙鬼畫符咁...
我地應該會係百利訂，d野好似幾精美。至於茶禮呢，榮華既包裝都唔錯。11月先過大禮，到時再決定吧!
講到婚禮禮服好多朋友仔都會非常煩惱，唔知點解，我從開始就決定左心目中既婚紗同晚裝 - 就係唔要蛋糕裙!! 百利 - Couple Beauty (www.facebook.com -> group -> couple beauty) 百利 - Charming Image (www.cimage.com.hk) 尖沙咀婚紗街 - Princess
咁鍾意蕾絲既我，THE ONE就緊係想要古典婚紗啦，不過價錢太貴，所以會搵仿古款式。相比其他準新娘，我已經篩選左不少既項目囉。
既然唔係千億新抱，咁目標都係中中價既婚紗店。至於喜好係好個人既，大家參考下好啦...
金都 - 我同莊生有行左個圈，無問過價錢。因為網上太多...唔... 所以唔會考慮。
網上有大量相片參考，可以睇中先約試身，慳番唔少時間。sales幾好人，就算無約都有機會俾你試身。
剛剛結婚既朋友仔用過，網上都有相片參考。不過成日都好多人，而且我已經有兩對相識既新人訂佢地，都係算囉。
有一系列幾高貴，不過價錢就... 莊生好鍾意，我就未有"叮叮"既感覺。佢一定要預約先可以試身。
觀塘 - 藝心
幾年前朋友仔用過，莊生話地點太遠(呢個其實好重要，下面講)，我本身亦無諗過係到租衫。但呢到既媽咪衫征服左我! 可能大家會覺得媽咪衫唔緊要，其實佢地身型先最難就。藝心既媽咪裙有成本相簿，出面通常就只有10款左右，係呢到一定可以滿足媽咪同未來奶奶。
太子 - 感恩無盡 (www.thanksgiving.com.hk)
一開始有好多相放係網上，不過而家已經鏟走哂，經理話俾好多公司抄款喎。呢間婚紗店唔出名，我係婚禮雜誌見佢地d款幾靚同比較特別，雖然店內既款唔太多，但有我想要既A-line款。sales服務好好，我第一次試衫時佢地有俾意見不過無迫我開單，重俾我媽咪試左兩條裙添。
除左Princess，大部份都係$4xxx有1件婚紗 + 2年晚裝 + 1件男禮。呢個價錢當然唔包拖尾/閃閃珠片等附加費。
選擇婚紗店舖小貼士
- 千祈唔好問結左婚朋友邊間好，佢地個個都會話自己用個間。反而睇下blogger既意見比較中肯。
- 我認為先參考5-6間店舖，再從中選1-2間就夠。愈多選擇就愈花多眼亂。不過就算你有預算考慮，都建議睇下d名(婚紗)店。起碼見識過貴價係咪好野，又或者租一套貴幾款平d都唔錯呀。
- 要留意額外加錢項目，有無包飾物、頭紗、披肩等。
- 相信大家都無可能係一間婚紗店搵到所以心儀既衫裙，我覺得2間已經係極限。因為租衫通常為三日兩夜，我個朋友仔分開租~尖沙咀兩間、觀塘一間，加上租掛同姊妹裙，真係辛苦死。
我地收到既第一份禮物啦! 係一對le sucre 砂糖兔公仔。家姐個牛魔王都有隻砂糖兔陪佢玩，我地幾鍾意。可惜一直都冇諗過用花車公仔，所以...
(太靚，連盒都唔想拆)
莊生問我會唔會放係花車，唔囉，要兔兔係車頭食塵好慘既。我決定搵佢地坐鎮reception table!!
家姐，多謝呀! 我(地)好開心收到呢份禮物呀
P.S "le sucre" 為法文, 係"砂糖"既意思。(真係好鬼sweet喎)
就咁上網搵下，已經有好多freelance幫人整花球，而且又唔貴喎，真係啱哂我呢種懶人。Jenny’s Flower
http://hk.myblog.yahoo.com/jenny-flower/
花球~$250, 手花~$20
Rhythmwedding
http://hk.myblog.yahoo.com/rhythmwedding-venue/
花球~$300, 手花~$20
我個花球係Venus幫我整既，佢既款式大部份都唔會翻造架! 我之前就傻傻咁一直問人地有冇，email來來回回十幾次。不過Venus都好好人，跟原有既款幫我造左個差唔多既，重好靚架。(為保持神秘所以冇相睇)
佢每個月尾到都有新款出架，大家有興趣記得bookmark啦!
Ron's Gifts & Flower Design
http://hk.myblog.yahoo.com/rongiftflower
花球~$500, 手花~$40
佢既花球都好靚，係人氣花球freelance! 不過因為太多單所以比較慢，我呢重心急人真係等唔到囉...
Ally
http://picasaweb.google.com.hk/allysflowers
花球~$300
River
http://hk.myblog.yahoo.com/jw!NkJ1RDWaHxt7M017KE_m
花球~$300, 手花~$25
何太十個好人! 我既手花同襟花都係麻煩佢。何太好快回覆我既要求，又會整個樣板俾我睇左先喎，重好快手添。佢又不時提供大優惠，正。我已經介紹左另一對朋友搵何太，我完左婚禮會俾想你架!
我既花球/手花小貼士
- 睇多d新婚雜誌
- 我地d嬌小型既女仔用圓型花球會好d，如果你好似kelly咁就可以試下花束型花球
- 白色既手花睇落唔錯，不過影相效果就麻麻。所以襯花要特別留意
- 訂造花球大約要1~2個月。如果去到10~12月呢d嫁娶旺季大家都係早訂為妙
- 襟花用T字扣會好好多，因為絲花都幾重
晚機去晚機返, 三日兩夜參加台灣婚禮。呢次旅程收穫豐富, 多左契爺契媽同台灣朋友一大班, 重見證一個世紀婚禮添!!
星期五晚10點到達桃園機場, 原來... 機埸既兌換店有開架??!! 早知唔需要係香港換台幣啦。我地今次經國泰假期訂套票住Holiday Inn, 竟然比旅行社平 
第二日早早到男家等一對新人回男家, 佢地好得意喎... 唔駛著"掛"又唔駛敬茶既?? 不過佢地同香港一樣, 會係男家屋企食午飯, 之後大家就可以休息等晚宴。
台灣既婚宴通常係星期六/日, 而且會較早開始(6點左右)。嘩... 佢地既佈置真係超級華麗呀!!! 聽講呢間飯店非常有名, 要半年前預定架... 重可以開50席添。全個場用真花佈置, 又有live band, 一個字 -- 勁!!
基本上婚宴既程序同香港差不多, 都有放成長片段同敬酒, 但佢地有致詞囉。因為一對新人係銀行界尖子, 而主人家又大有來頭, 所以致詞既竟然係... xx銀行總經理, xx市市長, xx局局長
至於菜式方面, 台灣既婚宴係無燒豬食架。佢地大約有10~12道菜, 都會有魚翅鮑魚, 但同香港既口味唔同。最有趣係頭盤...
恭喜哂!!! 真係好開心認識你地呀
同相識十年既大學同學旅行，原計畫一個"hea爆"之旅，最終變成行多過坐。不過今次好享受呢個機會，有幾多次可以同十幾年既朋友一齊去玩?
- 行程: 宜蘭2.5天, 台北2.5天
- 坐國泰早機去晚機返
- 7個大人 + 1個女王 (3歲BB)
- 無點諗過咩行程
大約11點到達台北機場，等另一位坐港龍既朋友中~~ 等我同飛輪海影張相先
原來港龍同國泰係唔同客運站架! 真係要小心先得。
包車直駛麗野民宿，我地住既係家庭套房，有少少似香港既渡假營。本來想訂d有特色既民宿，可惜太遲(我地一星期前先訂)無哂房，所以建議大家出發前多加準備。
第一日既行程去左"羅東林業文化園區"，有個舊火車站同d火車俾大家影下相玩下，應該係旅行團景點之一。
由羅東林業文化園區出發，友人話步行到另一景點。一行人由天光走到天黑，每次問人都話15分鐘就到... 千祈唔好信d台灣人呀，人地個個都揸車/電單車，15分鐘係車程囉。我地足足行左個幾鐘先去到一個好似彭福公園既地方 - "羅東運動公園"。
因為太累既關係，大家決定放棄夜市。試左任食唰唰鍋 (海晏，係羅東運動公園附近)，一人一鍋幾得意，咁多野食都唔駛$100，抵!!
祝我好運!!
